Sun, 11 Apr 2021

Hiligaynon News: 'Bantay ASF sa Baybay' ginapatuman

Philippine Information Agency
05 Mar 2021, 00:38 GMT+10

SYUDAD SANG ROXAS, Capiz, Marso 4 (PIA) - Hugot nga ginabantayan ang mga baybayon sa palibot sang Capiz agud indi makasulod ang mga baboy, karne sang baboy kag iban pa nga produkto subongman by-products sang karne sang baboy kaangot sa kampanya nga mapabilin nga luwas ukon hilway sa African Swine Fever (ASF) ang probinsya.

Ang nasambit nga tikang sang probinsya nga ginatawag "Bantay ASF sa Baybay" ang kasunod naman sa paglab-ot na sang ASF nga balatian sa

probinsya sang Masbate.

Nahibaluan nga ang Masbate kag Capiz ang may direkta nga rota pinaagi sa mga sakayan pangdagat bangud ginapatung-an lamang ang duha ka mga probinsya sang Visayan Sea.

Matandaan nga gindumili man ni Gobernador Esteban Evan Contreras ang pagsulod sa probinsya sang buhi nga baboy, karne sang baboy kag mga

produkto subongman by-product sang karne sang baboy nagikan sa Luzon kag sa luwas sang pungsod pinaagi sa Executive Order nga iya gin-isyu

sang Septyembre 2019.

Samtang nauna na nga gintukod sang gobernador ang Capiz Provincial African Swine Fever Task Force (CPASFTF) agud nga magpatuman sang hugot nga pagbantay agud nga maproteksyonan ang industriya sang baboyan sa ASF nga balatian.

Ginpahayag ni Provincial Veterinarian Dr. Leonel Abordo nga nagapabilin nga ASF - free ang Capiz bangud sang istrikto nga pagbantay sang mga nagasulod nga produkto sa probinsya ilabi na sa mga lugar nga apektado na sang ASF.

Ang publiko ang sarang makatawag sa ASF hotlines sang probinsya nga ginalakipan sang Office of the Provincial Veterinarian telephone number (036) 6214160 kag mga cellphone number 09085188789; 09938172127; 09356741806 kag 09327708274 agud magpaabot sang impormasyon bilang suporta sa ASF nga kampanya. (JBG/AAL/PIA Capiz)

More Africa News

Access More

Sign up for The Africa News

a daily newsletter full of things to discuss over drinks.and the great thing is that it's on the house!